Насими Кӯҳсор/Дар ҳошияи Насими Кӯҳсор
Ҳамзалӣ Яминов зодаи деҳаи кӯҳдомани Мулломир мебошад ва дар остонаи чилсолагии умраш қарор дорад. Ӯ сарвари мактаби деҳа ва ихтисосаш фанни биология-химия мебошад. Вале ин ҷавони ташнаи илму адаб ва фарҳанги ниёгон аз тақозои касби худ берун рафта, солиёни дароз боз ба шогирдон аз фанни «Алифбои ниёгон» дарс мегӯяд. Ӯ аз ваҳдату истиқлоли кишвар, зебогии диёр, манзараҳои нотакрори табиат ва дигар мавзуоти муҳими рӯз ба ваҷд омада, гоҳ-гоҳ шеърҳо эҷод менамояд. Шеърҳои ӯ соддаю равон буда ба дили хонанда таассуроти нек боқӣ мегузорад. Нахустмаҷмӯаи ӯ «Насими кӯҳсор» далели ин гуфтаҳоянд. Шеърҳои гуногунмавзӯи ин китобча чун насими шӯх ба ҷисму ҷони ташнагони шеър ҳаловат мебахшад. «Насими кӯҳсор» нахустқадамҳои Ҳамзалӣ дар дунёи шеър аст. Ва ин қадамҳо, албатта аз каловишу нуқсҳо орӣ нестанд. Умедворем, ки дар эҷоди шеърҳои нави худ Ҳ. Яминов ба олами шеър чуқур вуруд гашта, ба дилбастагони адабиёт сурудҳои хубу сара мегӯяд. Зеро шеър дунёи ҷавонии ӯро рангин сохта, бе он зиндагиро тасаввур карда наметавонад.
Ф. Турсунматов, Аълочии матбуоти Тоҷикистон.
Китоб[вироиш]
Муаллиф: Ҳамзалӣ Яминов
Муҳаррирон: Ёқуб Охон ва Рустами Ато
Мусаҳҳеҳ ва тарҳрез: Ф. Мамадҷонова.
Матбааи ноҳияи Ашт супориши N° 2851. Адади нашр 150 нусха
Шайдон, 2008.
Манбаъ[вироиш]
- Насими Кӯҳсор.